ఎంకన్న సామీ

ఏమయ్య సామీ, ఓ ఎంకన్న సామీ
దండాలు సామీ, దయజూడు సామీ

వేడికోలు సామీ, ఏడుకొండల సామీ

ఏపూటకాపూట కడుపుకాలుతోన్నా

                   మా బతుకు సాలిపోతోన్నా

నీకు మొక్కందే నిన్నోపాలి సూడందే

                  దినంగడవదయ్య సుకం ఎరుగమయ్యా

సీకుసింత పక్కనెట్టి ఒక్కదండం పెట్టినీకు

                  బతుకుబండిలాగుతాండాం

చిన్నప్పుడప్పుడెపుడో అయ్యనెత్తికెత్తుకొంటే

అప్పుడొక్కమాలి చూశా అయ్యసామీ నిన్ను

మళ్లాచూసే ఆశేలేదు బతుకెళ్ళమారే లోపు

అండాదండ నీవంటూ ఆనుకోని గడియేలేదు

నీ ఊసులే ఊపిరిగా జనమజనమలెళ్ళదీస్తా

నువ్వు లేని సొరగమైన నాకక్కరలేదయ్యా

చూడరండి కనులారా

చూడరండి కనులారా మనసారా పాడరండి  
కప్పురపు కాంతిలో కలికి శోభనాంగునీ

శంఖ చక్ర ధారుడై చిదానందుడూ

          అమ్మ అలమేల్మంగతో అలరించినాడూ

మకర కుండలాలు మెరయుచున్నవి అదిగో

          చెక్కిలి సొంపుల విరియబూయ

చిరుత గడ్డము మీది చిరునగవుల పూలవిగో

          కొనగంటి చూపుల కరుణామృతమదిగో

నిండైన తిరునామము మోము సొంపదిగో

          ధగధగల మెరపించు మణిమకుటమ్మదిగో

ఇరుదండల ధరియించిన నాగ భూషణాలు

          కటివరద హస్తాలతో కనువిందైనాడు

బ్రహ్మాది దేవతల వందనాలందిన వదిగో

          పాదారవిందాల శరణుగోరుచునూ

కందామా కనులారా

కందామా కనులారా కమలాక్షునీ                     

          భవ్యగుణధామునీ

          దివ్యచరితాత్మునీ                                               

          రమ్య రమణీయునీ

పునుగు, జవ్వాది అలముచున్నారదిగో

          పూర్ణేందు ముఖునీ

          విమల చారిత్రునీ

అమృతాభిషేకమ్ముల కురియుచున్నారదిగో

          అరవింద నేత్రునీ

          ఆర్తత్రాణ పరాయుణీ

ఆనంద నిలయాన విమలానంద శేఖరుడు

          ఆరూఢమైనాడది ఆనందముప్పొంగ

వేదనారాయణుడదిగో వేంకటాద్రి మీదనూ

          వెలసియున్నాడదిగో వెతలదీర్చగానూ

నిత్యపెండ్లికొడుకు

నిత్యపెండ్లి కొడుకాతడు సర్వమయుడు

పట్టుపుట్టముగట్టినాడు పరంధాముడూ

పసుపు పారాణిపెట్టి, కళ్ళకాటుకలద్ది

వెతదీర్ప నిలచినాడు కరుణాంతరంగుడూ

ఒడల చందనమలిమి, కస్తూరి తిలకమెట్టి

సొబగు సోయగాల సుందరాంగుడూ

వేడుక శ్రీ వేంకటేశు విభుడాతడు హృదయాలను

ముదమారగ మురిపించే మందహాసుడూ

కదలీ శ్రీ ఆనంద నిలయ ప్రభువై పరమాత్మడు

కలికల్మష నాశకుడై కరుణించువాడూ

వసుధైక విభుడాతడు వజ్రమకుటధారుడు

ఏకైక ప్రభువాతడు ఏడుకొండలవాడు

ముక్కోటి దేవతల మూలకారణంబితడు

మురిపించీ మరపించే మోహనాంగుడూ

ఎలతి ఎలతి పదాలతో ఎఱుకైనవాడు

నియతి నియతి మార్గాల పలుకుచున్నాడు

వేదోక్త విధులలో వేగిర పడుచున్నవాడు

శయనించి శేషాద్రిని భాసించినవాడూ

ఇదియే భాగ్యము – ఇదియే సౌఖ్యము

ఇదియే భాగ్యము – ఇదియే సౌఖ్యము

ఇదియే సత్యము – ఇదియే నిత్యము

నిగమార్థంబును నిక్కము నెఱగిన

ఈశంబుగ ఈ విశ్వము నిత్యము             -ఇదియే-

దృక్కులు చూడని దృశ్యంబిదియే

వాక్కు వచింపని వచనంబిదియే

మనసుకు తోచని మర్మంబిదియే

పరముల కన్నింటి పరమంబిదియే           -ఇదియే-

అక్షికి ఆవల అక్షయమైనదీ

కుక్షికి లోపల సుస్థిరమ్మదీ

వక్షాంతరమ్మున వెలుగుచున్నదీ

విశ్వమూలమై విత్తుగనున్నదీ                -ఇదియే-

వేంకటనాధుని పదముల సన్నిధి

పెనుచీకటుల పారద్రోలునది

కోటిసూర్యుల తేజ ప్రభయది

కోరిన క్షణమే దొరకే పెన్నిధి                             -ఇదియే-

రమణామృతము

1.   కర్త నేననే భావనొద్దురా
      కర్మ ఫలముపై ఆశవీడరా

2.   ఉట్టినెక్కక స్వర్గమెక్కడా

      నిన్నుతెలియక పరుల చింతనా


3.   సిద్ధులందు నీ దృష్టి నిలిచెనా

      పతనమౌను నీ తత్త్వ జీవనం

4.   ఇంద్రియాలకు కేంద్రమేదియో
      పరమతత్వపు మూలమే అది

5.   రమణనామమే పరమపావనం

      నిత్యస్మరణతో ముక్తి నిశ్చయం


6.   కర్మశీలుడూ భావశూన్యుడూ
      శుద్ధ చిత్తుడూ జీవన్ముక్తుడూ


7.   నీవు ఎవరనే నిత్యచింతనే
      అన్ని నీవనే తెలివి నిచ్చురా
   
8.   అద్దమందు నీ ప్రతిమలాగునే
      ప్రత్యగాత్మయే జీవాత్మగానయే


9.   నేనెవరనే సత్యశోధనే
      రమణ మార్గపు జ్ఞానసాధనం


10. అహం అన్నదీ ఎచటనున్నదీ
      ఈ విచారణే జ్ఞానపద్ధతి


11. నేను లేని ఈ అనుభవంబదే
      రమణదేవుని అనుగ్రహంబులే


12. బంధముక్తికీ అతీతమైనదీ
      బాహ్యహీనమౌ ఆత్మస్వస్థితి


13. అహంకారమే అణగినంతనే
      ఆత్మరూపము వెలుగునంతనే


14. వృత్తులన్నియూ అహంవెంబడే
      అహంవృత్తియే మనసుయైనది


15. వలను చిక్కిన పక్షిలాగున
      శ్వాస నిలిపితే మనసు నిలచును


16. చిత్తమందునీ మనసు నిలిచెనా
      స్వప్రకాశమౌ ఆత్మ దర్శనం


17. అరుణశైలమే పుణ్యథామము
      జ్ఞానసిద్ధిదం గిరి ప్రదక్షిణం


18. విను నిశీథిలో ప్రజ్వరిల్లిన
      జ్ఞాన జ్యోతియే రమణ భాస్కరం


19. కేవలంబు నీ నామ స్మరణచే
      పట్టిలాగెనే రమణ మంత్రమై


20. వేదవిద్యలు తెలియకున్ననూ
      ఒక్క చూపుతో తేటతెల్లమౌ


21. మోహమందునా చిక్కకుండుమా
      రమణుచరణమూ విడువకుండుమా

వస్తున్నాడొయ్ -- song on krishna

వస్తున్నాడొస్తున్నాడొస్తున్నాడోయ్

నల్లనివాడల్లరివాడొస్తున్నాడోయ్

సాగరగర్భంలో సోమకాసురుని తృంచి

వేదాలగాచినోడొస్తున్నాడోయ్

నీట మునిగిన భువిని

              మూపురాన కెత్తుకోన్న

శ్రీకూర్మ రూపుడిక వస్తున్నాడోయ్

హిరణ్యాక్షునిజంపి అవనిభారముదీర్చి

ఆదివరాహమూరితి వస్తున్నాడోయ్

ప్రహ్లాదవరదుడై హిరణ్యకశిపునడచి

నరసింహమైన వాడొస్తున్నాడోయ్

బలి గర్వమణచి సురవరులను బ్రోచి

వామనావతారుడిదిగో వస్తున్నాడోయ్

హుంకరించు క్షాత్రకుల పరిమార్చిగాచి

భార్గవరాముడిక వస్తున్నాడోయ్

రావణుని వధించి రమణి సీత నేలిన

ధర్మమూర్తి రాముడు వస్తున్నాడోయ్

కోకోటి మహిమల గోపాలుర గాచిన

రాథాంతరంగుడు వస్తున్నాడోయ్

ధర్మాల సారాన్ని నరులకు బోధింప

గౌతముండదిగో వస్తున్నాడోయ్

కలియుగంబులోన జనులపాపముబాప

శ్రీ వేంకటేశుడై వస్తున్నాడోయ్